home »
2014 October
The secret of beauty

減肥停滯不前

減肥停滯不前!!!!真的氣死我了~明明已經戒最愛的雞煲、M記、咖啡同甜品… …點解?!!!瘦過一排之前就無乜起色,唔知係咪天氣關係,成個人都經常處於病病地狀態。係咪我減肥不當啊~~~ M先生呢頭話完我揀飲擇食,嗰頭我就病啦!真係俾足位佢入,仲唔趁機串我~唔得!我唔可以衰俾佢睇~要努力啲呀!! 朋友話我可能新陳代謝開始進入退步期,所以以前自己用開的有效減肥方法,但宜家未必有用,佢用退步代替”衰老”,(真係唔該曬!)諗諗下又真係,以前食少啲都可以幾日內瘦2,3磅,宜家,真係無呢支歌仔唱啦~ 不過網上面呢篇文有教點提升新陳代謝,堅定流架?都無得我揀啦,試下無妨~ 佢係甘講架: ” 藉由後天調整,記住幾個小竅訣,便可幫助提升代謝能力。首先是停止無效的節食,否則你會發現身體越來越糟,因為當大腦接收到飢餓的訊息後,為了維持正常身 體機能,便會自動調節使新陳代謝速度變慢,雖然吃得少,但消耗能力同時也變小了,這只會造成身體的傷害。相反,改吃高纖食物能有效減慢澱粉質轉化為脂肪的 速度,促進腸道蠕動,提供絕佳的排毒效果。此外每餐亦要吃蛋白質包括瘦肉、魚、雞肉、豆腐、豆類、蛋白等提高新陳代謝率。」 「你 現在的脂肪率達到50%,完全拖慢個引擎,最快捷方法燒脂就是做足夠的帶氧運動來提升代謝,日常步行就是開始,不妨利用每天午餐後的休息時間,在公園附近 走走逛逛,以均勻的速度步行,不一定要流得滿身大汗。有效的就是每次20至30分鐘的有氧運動,揀你自己喜歡的,除可幫助消耗熱量、減輕體重,更大的好處 是運動後,能將氧氣帶到全身各部位,大大提升新陳代謝率、有效持續燒脂,效果會持續數個小時之久。」” 行路就得甘簡單,好!今日開始就早一兩個站落車,行返去先~呢啲甘笋的事情,緊係預埋M先生啦!哈哈~

read more
The secret of beauty

EQ低唔應該生仔?

幾 日前有朋友喺facebook share咗佢目睹一名非常媽媽作勢將鬧情緒的女兒推落MTR路軌,朋友質疑「EQ低的人不應生仔」。同14巴港女事件一樣,朋友雖然對呢件事繪聲繪影, 我又覺得,睇野唔可以單睇表面,你點知個媽媽生活有幾大壓力,個囡囡有幾難教,唔可以一刀切斷定一定係個媽媽唔啱。   家長於街頭以打罵方式教仔屢見不鮮。之前就有有「虎媽」將未滿三歲、扭緊計的兒子塞進垃圾箱,行為令途人側目;另外,也試過有四歲男童在商場「扭計」要買糖,遭「躁媽」掌摑,途人勸阻卻遭「躁媽」反罵「教仔唔關你事」,結果個媽媽因為涉虐兒被捕。   我 又唔係話呢啲非常媽媽做法值得認同,只係會諗背後促使呢件事發生的因素,搵到問題徵結先可以解決到架嘛。我係一個尚算幸福的港孩(call me 港女if u like),自細亞媽亞爸都唔會點出動到「武力鎮壓」,(所以宜家先俾佢地話縱得我太多),反而係講道理,幾時都話,講到你服,是為”日哦夜哦”也,哈~   所以我由細到大都唔會怕父母,駁嘴駁舌得黎,會懂得尊重佢地老人家,可以像friends般相處,唔係靠惡形惡相架~   我都好相信,子女係父母的倒模,你點做,佢點學,我希望第時如果一個唔好彩生到啲好似事件中啲細路甘頑皮,上天真係要賜多啲EQ俾我去駕馭呀!

read more
The secret of beauty

粉紅革命:國際乳癌關注月

女人,真係有好多野要煩,煩減肥、煩keep fit、煩拍拖、煩家庭、煩結婚、煩護膚、煩仔女、煩老公… …仲要煩女人病。 做女人真難,已經要忍受生仔M痛之苦,有啲病,可以話係女人專利,例如以前亞媽年代令人聞風喪膽的”乳癌”!! 踏入10月,周不時都在facebook見到由癌症基金會發起關注乳房健康的十月「粉紅革命」。今年的代言人轉咗法拉同李玟,都見陸陸續續有商家加入呢場粉紅革命,用曬名人又用曬不同商家。 基 金會為咗響應國際乳癌關注月,喺社會唔同層面推動粉紅活動,令人印象深刻0既係兩個代言人的「粉紅服飾日」廣告;另外走入商場,唔難發現最近多咗啲粉紅色 產品:好似帝苑酒店及agnès b. CAFÉ特地推出粉紅色的糕點;護膚品牌INGRID MILLET、CK內衣等,又向購買指定粉紅色產品或向穿粉紅衣的顧客提供優惠。 整個Marketing Plan以鮮粉紅色貫穿,既吸引眼球,加上合作商在不同範疇「發功」,營造鋪天蓋地宣傳果效,以「革命」來形容確不為過。甘大陣仗,都係想提醒各位女士要定期做檢查,預防勝於治療,萬一不幸患上,都可以及早就醫,存活率都高好多。 善事唔怕做,如果你工作環境許可的話,不妨多啲穿著粉紅色衣物,提醒下身邊啲sisters,一齊響應國際乳癌關注月啦!

read more
Top